ليه كهربا؟

١-العربيات الكهرباء هي الحاضر والمستقبل شئنا ام ابينا، لان التكنولوجيا هي المستقبل و ماحدش هيقدر يوقف قطار المستقبل

٢-مصر اكتر دوله محتاجه للعربيات الكهربا لاننا بنصدر كهربا و بنستورد بنزين ، فقريبا جدا العربيات الكهربا هتاخد نسبه كبيرة من السوق

٣- انت ممكن يكون عندك محطة شحن في البيت لكن لا يمكن يكون عندك محطة بنزين

٤- تعدد الشركات في مصلحة العميل و السوق و حتي الشركات نفسها لانه بيعزز ويقوي موقف العربيات الكهربا في مصر

٥- اي محاوله للمقارنه بين تكلفة السيارات الكهربائية و السيارات البنزين هتكون في صالح السيارات الكهربائية تحت اي ظرف او مسمي لان ده التوجه العالمي و الموضوع اتدرس من كل الجوانب مليار مرة و اثبت نجاحه لدرجة ان في بعض الدول بيستبدلوا جميع السيارات البنزين باخري كهربا و لابعاد كتير غير التوفير ده المستقبل

٦-السيارات الهايبرد في العالم كله هي المرحله اللي قبل الكهربا يعني المرحلة التمهيديه لان المستقبل كهربا و بس ، لورحت اوروبا و سالت هتعرف ان الكهربا بالحجز و الهايبرد متوفر في كل حته و ماحدش بيشتريه، لان الهايبرد ليه صيانات و فيه بنزين فانت تقريبا ما عملتش حاجه

٧- بالنسبه لموضوع الرينچ و العربيه بتمشي ١٥٠ و ٢٠٠ او ٥٠٠ او ٧٠٠ كم طول ما انت مشتري العربيه بمشتملاتها يعني (-كابل-شاحن منزلي ) الرينچ مش هيفرق معاك لان المحطات في كل حته و هتقدرتشحن في البيت و المحطات ، طبعا الرينچ الاكبر هيريحك اكتر لكن العربيه و التجربه تستحق انك تضيع نصف ساعه زياده و تحافظ علي امنك و سلامتك و فلوسك، و خلي بالك انك بتخصم ايام وليالي الصيانه اللا متناهيه سواء في التوكيل او الحرفيين ، يعني كانك بتقسط زمن التصليح

٨- اسعار العربيات الكهربا غاليه جدااااا!!!!!!!! مش حقيقى لان اسعار العربيات الكهربا قريبه جدا من اسعار البنزين لكن المتوفر منها كله عربيات ذات جوده و سعرها اصلا في البنزين مش قليل. زي الجولف و الفيات و الكيا سول و الفورد الخ. بس ضيف عليها انها فول اوبشن وزياده حبتين و كمان كهربا

٩-الهدف الرئيسي من العربيات الكهربا مش التوفير بس لكن كمان التجربه بكل ما تحمل من مميزات للبيئه و للاقتصادوللمستقبل و للمستخدم فماتحسبهاش حسبة فلوس بس

١٠-فيه حاجات مفروضه علينا كدوله تخلينا مجبرين نقلل من التلوث ده غير ان العربيات الكهربا بتنمي اقتصادنا و عشان كده اقتناء عربيه كهربا هو واجب وطني قبل ما يكون توفير ليك و بالنسبه للدوله فهي عملت اللي عليها و فتحت الاستيراد للسيارات الكهربائيه بدون جمرك فالدور علينا و عليك

١١-العربية الكهربا هي اي فون بيمشي

ملحوظه: لن تنتهى التساؤلات و لن تنتهى الشائعات و لكني ارجوكم الا تساعدوا الا في انتشار الحقائق و اتمنى توخي الحذر في كل ما يقال فنحن نصنع سوق كامل جديد يحتاج الى دعمكم ووعيكم ليعود بالنفع عليكم و علينا و علي كل من يحمل ثقافة المستقبل علي عاتقه ، و نحن علي اتم استعداد للتعاون مع كل الاطراف و الاجابه علي كل التساؤلات لنبني سويا اول سوق نظيف للطاقه النظيفه في مصر.